Merry Christmas

Sorry呀! 久等了, 我呢個月都好忙, 都冇好好咁update過我呢個blog! 我從來都未試個會過一個好忙既12月, 慶祝生日啦, 返學啦, 交兩份assignment啦, 上律師樓啦, 準備去旅行既schedule啦, 明天又出發去旅行啦....

食左好多餐生日lunch & dinner呀.... 唔肥都假, 我諗去埋旅行返黎唔肥5磅就奇..... 去完旅行返黎要好好咁做下運動先得!

aiya, 去完旅行返黎4號仲要考試, 好彩公司放假放到4號先返工, 咁我就可以1月1-3日係屋企閉關溫書了! auditing..... 好難呀.... good luck for me lar~~

Dinner @ Sawadee Thai

佢地都係好耐冇見既老朋友了, joey & kambo, 生日個晚就同佢地食dinner勒!

今次經朋友介紹, 我地去左呢間"泰屋", 地方好大好靚, 又舒服, 價錢同食物質素唔成正比家!! hehe, 質素>價錢!!

同呢兩位老朋友傾左好耐計, 只係講ITC既趣事, 都已經夠我講足一晚, KAMBO早走左, 你走運了! 哈哈!

p.s. 下次可以再去!

Happy Birthday to Me

估唔到公司會買個cake比我, 個個同事都話我好彩, 因為舊年d同事都冇生日蛋糕啦架, 我係第一個, x'mas party又抽到獎.... 唔通我真係有運行??

Thanks Emma

多謝 mama~~

我可以帶湯或者糖水返公司啦~ 哈哈!

諗起我因為趕時間所以掉低左你係delifrance, 真係好過意唔去... 無辦法啦, 因為我已經唔係你ITC返工了 :(

下次都係唔好去delifrance食啦~ 雖然真係好好味, 不過真係好多人又耐, 時間好趕呢~ 不過你仲勁啦~ LUNCH食左2個鐘, 哈哈

Anyway, 你呢份禮物好warm呢! kakaka

Thanks Monkey

哈哈~ 今次都係anna sui既化妝袋呀! 多謝monkey~~ 雖然今次生日收左兩個anna sui既化妝袋, 不過我都係咁鐘意, 我會諗方法用左佢既~~ 哈哈~ 因為係anna sui也嗎!

上星期日同monkey, 小慧同埋wolf去左TST食buffet, (忘記影相添), 叫做"松屋", 我初時覺得個名好熟, 到埋單既時候收到張6折既VIP咭, 先知原來就係我以前公司美銀樓下既日本料理!

不過6折真係好抵呀, 要幾錢我就唔係好清楚了, 但我諗6折之後每位百幾蚊啦, 任食喎!! 有sashimi, sushi, 燒物.... 嘩, 好多野食家!!

下次同你地去也 :p

Anna Sui 呀!

多謝你既生日禮物呀~~ christine~~

你果然有定期睇我既blod也吓!! 乖! 哈哈
我會打埋佢去日本架啦~

無言感激.......

X'mas party

感覺係未好似"宮"呢? haha

上星期五, 我地MITSUI HK係Ritz-Carlton擺左16圍, 搞左個x'mas party!

我用左我半桶水既日文, 同一個由深圳落黎既日本人同事傾下計~~ 呀! 日文真係好難呢~~

當晚我最開心既係, 係我無預期既情況下, 抽中左一部portable dvd player! 初時叫我個number既時候, 我以為自己聽錯係ninety, (我的是19號), 但佢叫埋我個名既時候~ woo, 係我呀! 多謝晒!

世紀海景酒店

我同janis上星期四晚去左西環既世紀海景酒店食buffet.

嘩~ 我諗自我懂性開始, 應該從未黎過西環呢個地方... 我同janis由金鐘坐丁丁到西環, 落左車之後, 感覺好似去左深水步區, 感覺好得意, 有點怪, 但又好似返左去以前細個返學既感覺!

多謝janis請我食buffet呀! 雖然酒店既食物唔係特別好食, 普普通通啦! 不過都比我見識到咩叫"火焰雪山", 哈哈!

P.S. Janis = 余詩曼 = 楊怡 :p

Congratulations! Ann!!

好得意呀! 我覺得呢份小禮物真係好好, 唔會再係水晶或者係soap, 好特別呢!

ANN, 你好靚呀~ 好似個小公主呀! 有相記住比我地啦~

個晚我地成班ITC坐滿一圍, ANN, 係未你專登安排我地坐埋一邊, 等我地自成一角架? 不過我地坐係一角, 真係好好多, 因為我地真係好嘈呀! 哈哈, 無可否應, 我地痴埋一齊, 就會嘈喧巴閉呢~ 搞到d waiter 都唔敢行埋黎, 隻乳豬上得幾遲也~ 我啦, viann啦, 同埋syron笑到個waiter分乳豬既時候手陣陣, 要中途換人.... 唔好意思呀, 失禮了:p

見到Ann結婚, 真係有d羨慕, 我會係度諗, 幾時到我呢? 不過我知一定有排啦~ 我要求高也嗎! 哈哈! 其實又唔會太高既, 係麻煩咁羅~~ 最主要係第一眼既感覺, 之後有冇令我心跳加速, 之後就係佢個人既性格咁啦! 哈哈, 要求都幾多喎, 要過三關! haha! 我會比心機架啦~

秋季BBQ

我地今次就去左小欖燒烤樂園BBQ!

雖然真係山長水遠, 不過我可以好肯定同你講, 係值得既! 因為個度比起龍鼓灘更靚! 天公造美, 天氣唔會太熱, 又冇落雨, 我都話天文台係唔準家啦~~

我地一行7大1小, 大家都害怕遲到者死呢個咀咒, 都算係好準時1400到達荃灣地鐵站. 今次既秋季旅行, 一來係滿足一下我地呢班為食鬼, 二來就係同Cartier慶祝佢既牛一, 生日快樂!!

另外令我難忘既係, 我好欣賞寶寶呀! 兩點幾三點先開始燒, 但係佢四點就走羅喎, 我問佢點解都會黎, 佢既答案係: "應承左點都黎啦!" 我諗我可能都做唔到了.... 佢仲要住柴灣喎~~

講返個BBQ場先啦~ 我地係警察宿所個站落車, 之後沿著斜路向下走... 轉了個彎, 嘩~ 一個字 "pro"! 個BBQ場可以容納過千人啦~ 有電視, 有風扇, 我同maymay一坐底就猛燒猛燒, 由三點食到八點, 冇停! 哈哈! 所以我都冇落個海灘行啦~ 不過個天真係好靚!

原來maymay都可以好食得~ 有伴啦~ christine你要努力啦~ 哈哈! 我地大食?? 有冇搞錯??!! 我地兩個一成都未有你地一個二個飽到停晒手???!! 唔得! 下次再黎過!!

意大利空運到港的栗子

點解影到反晒光家?? :p

和民のレモン味香薰

呢樽係上次同"補習老師"係和民食dinner既時候送既

都幾靚也~~

My Bonus, My Boot

我用左公司比我既bonus, 係cour carre買左呢對boot

靚唔靚先? 不過原先我睇佢個封我唔係咁鐘意家

我係睇中第二對既, 不過試左又唔係好睇

呢對係個sales推薦既, 著落又好睇喎...

其實做人係未應該

唔係傷害到人又傷害到自己既情況下

每樣都去試

可能有意想不到既好事呢?!

殘酷的mid-term

雖然mid-term已經結束, 但我同我的同學都要返屋企流三公升眼淚, 我可以用四個字來形容我既心情---> 死路一條

四條有兩條係識答.... 至少我認為啦, 幸好有"補習老師"幫我溫下個條control environment & control activity, 如果唔係要我自己溫, 一定睇完又唔記得..... 跟住有條就係appointment & removal of auditor啦~ 咁就要多謝ITC了, 個一年冇白廢過啦~ 基本上份notes睇一次都可以答到題目, 至於剩低個兩條...... 唔好題勒!

好啦~ 休息一個星期, 先努力再開始溫習啦~ 我相信每日當佢好似harry potter咁睇, 不斷重複咁睇, 點都會記得既~ 係未?!

ANNA SUI到啦~

把傘同條裙都好靚呀!

好靚既袋呀..... 第二張中間黑色個個好鬼死靚啦~

袋呀袋呀袋呀 銀包呀銀包呀銀包呀

BOOT呀~~ 我好鐘意呀.....

好型, 好正!!

絛毛毛頸巾好靚喎

全部都好靚呀~~ 我要~~

星期日就Mid-term啦~

好徬徨既一科 - Auditing.... 唉~

朋友向我說, Auditing好易者, 睇左theory, 再吹水就得啦~ 但係又有朋友考左兩三次先pass.... 雖然今次亞sir終於屈服, 星期三比左tips, 距離星期日只得三日時間, 點溫得切呢? 要看要背有幾十頁, 整個星期都好夜瞓呀! 最早0100, 最夜0230... 又再次試過搭MTR企係度都瞓著.... 不過溫左咁耐, 都唔知讀左咩, 所以今日約了朋友去中環既和民食晚飯, 一邊講一邊食, relax下, 我地都食左成三個鐘呵~ 不過可能太攰了, 連我既朋友都見到我真係一個好攰樣~~ 呵呵! Thanks & Sorry, 精神欠奉, 希望下次唔會啦~ 食dinner 當中, hehe, 我都唔執輸羅份notes出黎, 等佢教下我啦~ 其實我都覺得唔係咁好意思, 平時返工都忙了, 放左工食餐飯都要睇咁多字, 又講解.... 係千萬個咁好意思之中又帶無盡既感激, 縱使解釋完後依舊不太明白, 但感覺比起亞sir講的都明白多點, 唉! 唯有update下呢個blog, 之後就早d瞓, 聽日就最後"沖廁"啦!

下星期先再update啦~ 不過都可以黎聽下歌啦~

澳門可以靚到咁

http://www.fotoc.com/studio/dado/macau/welovemacau/

同cookie行街街

今日終於可以同cookie行下街街, 佢今次乖左好多呀! 佢吠我都只係有兩個原因: 1) 快d行啦 2) 抱我啦!

哈哈! 行左10分鐘, 佢已經累得吠我要我抱! 佢好叻呀! 咁耐冇行個樓梯, 佢毫不猶疑就行了! 叻女! 諗住同佢行下大公園, 不過未到佢已經累了! 唔緊要啦~ 慢慢練習返就可以行得多d架啦~